Na nithe a dhéanaimid

Le bunú an Údaráis Póilíneachta agus Sábháilteachta Pobail (PCSA), tugtar isteach ré nua sa chuntasacht póilíneachta agus sa tsábháilteacht pobail in Éirinn. Is é ról PCSA formhaoirseacht agus measúnú a dhéanamh ar na seirbhísí póilíneachta a sholáthraíonn an Garda Síochána, agus é mar aidhm aige a chinntiú nach é amháin go mbíonn muintir na hÉireann sábháilte ach go mothaíonn siad go mbíonn siad sábháilte freisin ó lá go lá laistigh dá bpobail áitiúla.

Déanann PCSA é sin ar bhealach neamhspleách trédhearcach. Dá réir sin, tacaíonn PCSA le soláthar éifeachtach agus feabhsú leanúnach na seirbhísí póilíneachta in Éirinn.

Cuirtear síos ar chuspóir, feidhmeanna agus cumhachtaí PCSA in Alt 122 den  Acht um Póilíneacht, Slándáil agus Sábháilteacht Pobail, 2024, agus áirítear leo sin:

  • Tosaíochtaí Póilíneachta don Gharda Síochána a chinneadh, ar tosaíochtaí iad ina sainaithnítear réimsí a dteastaíonn tuilleadh dírithe nó airde ina leith chun feabhas a chur ar an tseirbhís póilíneachta a sholáthraítear don phobal;
  • An fheidhmíocht póilíneachta a mheasúnú i gcomparáid leis na Tosaíochtaí sin, le Ráiteas Straitéise agus Plean Seirbhíse Bliantúil an Gharda Síochána agus leis an Straitéis Náisiúnta um Shábháilteacht Pobail;
  • Cigireachtaí a ghabháil de láimh agus moltaí a dhéanamh chun feabhas a chur ar sheirbhísí póilíneachta;
  • Caidreamh fairsing a dhéanamh le pobail agus le geallsealbhóirí chun éisteacht leis na heispéiris atá ag daoine sa phóilíneacht agus ina bheith dá bpóilíniú agus chun na heispéiris sin a thuiscint;
  • Caighdeáin ghairmiúla phóilíneachta (caighdeáin chearta an duine san áireamh) agus feabhsú leanúnach na póilíneachta a chur chun cinn, ar aon dul leis an dea-chleachtas idirnáisiúnta;
  • Feasacht an phobail ar nithe póilíneachta a chur chun cinn trí thuarascálacha a fhoilsiú, trí imeachtaí a reáchtáil agus trí thaighde a ghabháil de láimh agus a choimisiúnú ar nithe a bhaineann leis an bpóilíneacht;
  • Eolas agus comhairle a thabhairt don Aire maidir le forbairtí sa phóilíneacht agus maidir leis an dea-chleachtas póilíneachta; agus,
  • Caidreamh a dhéanamh le Stiúrthóir na hOifige Náisiúnta um Shábháilteacht Pobail agus leis an Aire Dlí agus Cirt, Gnóthaí Baile agus Imirce ar an straitéis náisiúnta um shábháilteacht pobail a fheabhsú.