Rinneadh an tÚdarás Póilíneachta agus Sábháilteachta Pobail (PCSA) – an comhlacht formhaoirseachta nua don Gharda Síochána – a bhunú go foirmiúil inniu (an 2 Aibreán 2025), ag teacht sna sála ar thosach feidhme an Achta um Póilíneacht, Slándáil agus Sábháilteacht Pobail, 2024. Beidh sé mar ról ag PCSA formhaoirseacht agus measúnú a dhéanamh, ar bhealach neamhspleách trédhearcach, ar fheidhmíocht an Gharda Síochána i dtaca le seirbhísí póilíneachta.
Is é PCSA an eagraíocht chomharba ar an Údarás Póilíneachta agus ar Chigireacht an Gharda Síochána, agus é ag tógáil fhormhór na bhfeidhmeanna a bhí acu cheana air féin. Chomh maith leis sin, imreoidh sé ról breise Sábháilteachta Pobail ina chinntiú nach é amháin go mbíonn muintir na hÉireann sábháilte ach go mothaíonn siad go mbíonn siad sábháilte freisin ó lá go lá laistigh dá bpobail áitiúla.
Ag labhairt di faoi bhunú an Údaráis Póilíneachta agus Sábháilteachta Pobail, dúirt Elaine Byrne BL, Cathaoirleach PCSA nua:
“Le cruthú PCSA mar ghníomhaireacht nua, tairgtear an deis formhaoirseacht neamhspleách póilíneachta a athshlamhlú agus comhlacht neamhspleách láidir a bhunú a bheidh dírithe ar fheabhas a chur ar thorthaí i réimse na póilíneachta agus i réimse na sábháilteachta pobail, agus seirbhís póilíneachta atá éifeachtach agus a bhfuil iontaoibh inti á soláthar do dhaoine aonair, do theaghlaigh agus do phobail ar fud na hÉireann.
Cé go bhfuilimid ag dul trí thréimhse aistrithe, is féidir le pobail ar fud na tíre a bheith deimhin de nach mbeidh aon chur isteach ann le linn na tréimhse sin ar an obair leanúnach formhaoirseachta.
Táim ag súil le hobair i gcomhar leis an bhfoireann i ngníomhaireacht nua PCSA, le Coimisinéir an Gharda Síochána agus leis an bpobal chun feabhas a chur ar an bhformhaoirseacht neamhspleách agus thrédhearcach ar sheirbhísí póilíneachta in Éirinn.”
Cuirfear an chéad chruinniú poiblí de chuid PCSA ar siúl an 29 Bealtaine 2025. Is féidir tuilleadh faisnéise faoin eagraíocht nua a aimsiú ar www.PCSAIreland.ie, ar Bluesky, ar LinkedIn agus ar X.
*CRÍOCH**
Teagmhálaí: Glenn Mason, an tÚdarás Póilíneachta agus Sábháilteachta Pobail, Seoladh Ríomhphoist: glenn.mason@PCSAIreland.ie
Nótaí d’Eagarthóirí:
Maidir leis an Údarás Póilíneachta agus Sábháilteachta Pobail
Ag teacht sna sála ar thosach feidhme an Achta um Póilíneacht, Slándáil agus Sábháilteacht Pobail, 2024, an 2 Márta 2025, díscaoilfear an tÚdarás Póilíneachta agus Cigireacht an Gharda Síochána agus cruthófar eintiteas nua, eadhon an tÚdarás Póilíneachta agus Sábháilteachta Pobail (PCSA). Cuimseofar ann na feidhmeanna roimhe a bhí ag an Údarás Póilíneachta agus ag Cigireacht an Gharda Síochána, de bhreis ar ról nua i réimse na sábháilteachta pobail.
Beidh sé mar chroíchuspóir ag PCSA formhaoirseacht agus measúnú neamhspleách a dhéanamh ar fheidhmíocht an Gharda Síochána maidir le seirbhísí póilíneachta a sholáthar chun a chinntiú go mbeidh na seirbhísí sin éifeachtach agus go gcuirfear feabhas leanúnach orthu ar son shábháilteacht an phobail.
Ar an iomlán, soláthrófar le PCSA an deis formhaoirseacht neamhspleách póilíneachta a athshlamhlú agus beidh sé in ann é féin a bhunú mar chomhlacht neamhspleách láidir formhaoirseachta a bheidh dírithe ar fheabhas a chur ar thorthaí agus eispéiris i réimse na póilíneachta agus i réimse na sábháilteachta pobail, agus seirbhís póilíneachta den chéad scoth á soláthar do dhaoine aonair, do theaghlaigh agus do phobail ar fud na hÉireann.
Cheap an Rialtas an Dr Elaine Byrne BL mar chathaoirleach ainmnithe PCSA an 15 Deireadh Fómhair 2024 mar aon le comhaltaí PCSA: Joe Costello; Michael Feehan; Nessa Lynch; Martina Moloney; Freda McKittrick; Tony O’Brien; Ken O’Leary agus Emma Reidy.
Ceapadh Helen Hall mar Phríomhfheidhmeannach ainmnithe PCSA tar éis comórtas a reáchtáil publicjobs i dtús na bliana 2024.
Beathaisnéis Elaine Byrne B.L.
Abhcóide cleachtach i gCuaird an Oirdheiscirt agus i gCuaird Bhaile Átha Cliath a dhéanann speisialtóireacht sa Dlí Rialála agus sa Dlí Fostaíochta is ea Elaine Byrne.
D’fhóin Elaine Byrne mar chomhalta den Údarás Póilíneachta ó mhí Feabhra 2021 i leith agus ceapadh í mar Chathaoirleach le héifeacht ón 1 Eanáir 2024 i leith. Ghníomhaigh sí mar shainchomhairleoir ar nithe rialachais don Choimisiún Eorpach, do na Náisiúin Aontaithe agus don Bhanc Domhanda roimhe seo. Foilsíodh an leabhar uaithi dar teideal “Political Corruption in Ireland 1922-2010: A Crooked Harp”, sa bhliain 2012. D’fhóin sí mar chomhalta de Ghrúpa Athbhreithnithe Hamilton ar Choireacht Eacnamaíoch agus Éilliú agus mar chomhalta den Ghrúpa Oibre um Athchóiriú de chuid an tSeanaid. Iar-acadóir agus iar-iriseoir is ea Elaine.
Beathaisnéis Helen Hall Uas., an Príomhfheidhmeannach atá ag teacht isteach.
Bhí Helen Hall ar an gcéad Phríomhfheidhmeannach ar an Údarás Póilíneachta, arb é an comhlacht atá ag formhaoirsiú fheidhmíocht an Gharda Síochána maidir le seirbhísí póilíneachta a sholáthar don phobal le breis agus naoi mbliana anuas é.
Tá sí ag obair i róil formhaoirseachta agus iniúchóireachta le breis agus 30 bliain anuas. Áirítear leo sin róil le Price Waterhouse i mBaile Átha Cliath; róil leis na Náisiúin Aontaithe agus leis an mBanc Domhanda sa Mhaláiv; ról mar chomhpháirtí le Deloitte, Deisceart na hAfraice; agus róil le Clár Bia Domhanda na Náisiún Aontaithe sa Róimh. Sa bhliain 2006, chuaigh sí isteach san fhoireann a bhunaigh Údarás Maoirseachta Iniúchóireachta agus Cuntasaíochta na hÉireann, arb é an comhlacht atá freagrach as formhaoirseacht a dhéanamh ar ghairm na cuntasaíochta agus na hiniúchóireachta é, agus tháinig sí chun bheith ar an bPríomhfheidhmeannach ar an gcomhlacht sin sa bhliain 2012. Tá sí ar an gCathaoirleach ar Choiste Iniúchóireachta na gCoimisinéirí Ioncaim agus tá sí ar an gCathaoirleach ar One Family (dá ngairtí Cherish roimhe seo), ar carthanas é a thacaíonn le tuismitheoirí singile. Is Cuntasóir Cairte í agus tá céim MA i gCoireolaíocht aici.